Կազմակերպութեամբ ՀՅԴ ԼԵՄ-ի Կեդրոնական վարչութեան երէկ՝ ուրբաթ, 5 մարտ 2010-ին, երեկոյեան ժամը 6։30-ին, Համազգայինի «Լ. Շանթ» մշակութային կեդրոնի «Գ. եւ Հ. Արմէնեան» սրահին մէջ տեղի ունեցաւ լիբանանահայ վարժարաններու 2009-ի պրէօվէի քննութիւններուն գերազանց արդիւնք արձանագրած աշակերտներու պարգեւատրման հանդիսութիւնը՝ ներկայութեամբ հայկական վարժարաններու տնօրէններու, կրթական պատասխանատուներու, ուսուցիչներու, ծնողներու եւ աշակերտներու։

Հանդիսութեան բացման խօսքը ՀՅԴ ԼԵՄ-ի Կեդրոնական վարչութեան անունով արտասանեց Արմիկ Տիւքենճեան, որ նշեց, թէ ազգի մը խոստմնալից ապագան պայմանաւորուած է կրթական համակարգի աշխուժութեամբ եւ հզօրութեամբ, եւ այդ համակարգին հիմնական սիւնն է դպրոցը, որուն մէջ կը կազմաւորուի անձի մը նկարագիրը, մտածելակերպն ու անհատականութիւնը։ Տիւքենճեան ըսաւ, թէ հայ դպրոցը լոկ գիտութիւն ջամբող կառոյց մը չէ, այլ՝ հայերէն սորվեցնող, հայոց պատմութիւն աւանդող եւ ազգային դիմագիծը կերտող հզօր կեդրոն մը։

Հայ դպրոցին դիմագրաւած դժուարութիւններուն անդրադառնալէ ետք Արմիկ Տիւքենճեան հաստատեց, թէ պարգեւատրման նշեալ հաւաքը կը միտի քաջալեր հանդիսանալ հայ դպրոցին, որուն առաքելութեան իրականացման մէջ մեծ է հայ ընտանիքներուն դերակատարութիւնը։
Ապա Ռոզա Նալպանտեան ասմունքեց Երուանդ Գոչունեանի «Բաժանման խորհրդածութիւններ» ստեղծագործութիւնը։

Հանդիսութեան պատգամը փոխանցեց Հայ կաթողիկէ Մեսրոպեան բարձրագոյն վարժարանի տնօրէն Կրեկուար Գալուստ, որ նախ եւ առաջ շնորհաւորեց ներկաները՝ Ամերիկայի քոնկրեսի Ներկայացուցիչներու տան արտաքին յարաբերութիւններու յանձնախումբին կողմէ Հայոց Ցեղասպանութեան թիւ 252 բանաձեւին որդեգրման առիթով՝ աւելցնելով, որ այս արդիւնքին կարելի եղած է հասնիլ շնորհիւ երկարատեւ աշխատանքի, եւ այս պայքարին մէջ ԼԵՄ-ականները ունեցած են իրենց բաժինը։

Գալուստ հաստատեց, թէ ուսումնատենչ երիտասարդութիւն ունենալու համար անհրաժեշտ է ոչինչ խնայել, որպէսզի հայ երիտասարդութիւնը հասարակութեան մաս կազմէ իբրեւ զարգացած, կիրթ, առողջ հոգեբանութեամբ առաջնորդուող մարդկային ընկերութիւն մը, որուն անդամները կարողութիւնը կունենան ապրելու ու գործելու իբրեւ իրաւ «մարդ»։

Ան խօսքը աշակերտութեան ուղղելով շնորհաւորեց մրցանակակիրները՝ մաղթելով, որ այս յաջողութիւնը դառնայ սկիզբը նորանոր նուաճումներու։
Ան նաեւ շնորհակալութիւն յայտնեց ծնողներուն, որոնք յաղթանակին առաջին տէրերն են եւ որոնց զրկանքներով հայ մանուկը մուտք գործած է հայ դպրոց՝ ստանալով ազգային եւ մշակութային դաստիարակութիւն։ Խօսելով գերազանց արդիւնք արձանագրած աշակերտներուն համախմբման երեւոյթին մասին Կրեկուար Գալուստ յայտնեց, թէ այս հաւաքը միասնականութեան իւրայատուկ կոչ է, որուն ականջալուր պէտք է մնանք, քանի որ միասնականութեան կարիքը այսօր շատ զգալի է զանազան մարզերու մէջ, եւ այսօրուան նման համախմբողի դերակատարութիւն կատարող ձեռնարկներով կարելի է բարելաւել գաղութային կեանքը։

Իր խօսքի աւարտին Գալուստ յատուկ շնորհակալութիւն յայտնեց ՀՅԴ ԼԵՄ-ին՝ հայ վարժարանին ի նպաստ անոր կատարած այս նշանակալից եւ զօրակցութիւն յայտնող նախաձեռնութեան համար։ Օրուան պատգամին յաջորդեց դաշնակով նուագ մը՝ կատարողութեամբ Կարին Պօղոսեանի, որմէ ետք բաժնուեցան 2009-ի պրէօվէի քննութիւններուն գերազանց արդիւնք արձանագրած աշակերտներուն մրցանակները։

Անուն

Ստուգման կոդ

Հաղորդագրություն