Հ.Յ.Դաշնակցության երիտասարդական և ուսանողական միությունների բարձրագույն մարմինների ներկայացուցիչների համահայակական խորհրդաժողովը տեղի ունեցավ թվականիս Դեկտեմբերի 18-20-ին Երևանում:

Խորհրդաժողովին մասնակցում էին Հ.Յ.Դ. ուսանողական՝ վեց, երիտասարդական՝ տասնյոթ և պատանեկան՝ տասնյոթ միությունների բարձրագույն մարմինների ներկայացուցիչներ՝ ընդհանուր թվով քառասունինը հոգի աշխարհի տարբեր երկրներից` Կանադա, ԱՄՆ-ի Արևմտյան և Արևելյան շրջաններ, Ֆրանսիա, Հունաստան, Եգիպտոս, Լիբանան, Իրան, Արցախ, Հայաստան և այլն:

Ժողովը քննարկեց հայ երիտասարդության հիմնախնդիրները հայրենիքում և սփյուռքում, մանրամասնորեն անդրադարձավ դաշնակցական երիտասարդության առջև ծառացած մարտահրավերներին և մշակեց գործունեության ռազմավարություն` հատուկ շեշտ դնելով Հայաստան-Սփյուռք կապերի ամարապնդման ուղղությամբ կատարվող աշխատանքներին խորքային բովանդակություն հաղորդելու անհրաժեշտությանը:

Ժողովը անդրադառնալով Հայաստանի և Թուրքիայի միջև ստորագրված արձանագրություններին, մեկ անգամ ևս իր ընդ վզումը հայտնեց նախապայմաններով առլեցուն այդ արձանագրությունների նկատմամբ, դատապարտեց այն և Հայաստանի Հանրապետության իշխանություններից պահանջեց անհապաղ դադարեցնել բանակցությունները, դրանք սկսել նոր մեկնակետից և հանդես գալ հայ մարդուն, հայ ազգին և հայկական պետականության արժանապատիվ դիրքերից, ամրագրելով, որ երկու երկրների միջև հետագայում հարաբերությունների սերտացումը պետք է հիմնավորած լինի Թուրքիայի կողմից Հայոց Ցեղասպանության ճանաչման և Ցեղասպանության վնասից հատուցման վրա` ներառյալ հողային իրավունքների ճանաչման:

Արցախի անկախության միջազգային ճանաչման այլընտրանքը Հայաստանի Հանրապետության հետ պաշտոնական վերամիացումն է. այլ ճանապարհ չկա: Արցախի ճակատագրի տնօրինողը արցախահայությունն է, իսկ Հայաստանն ու Սփյուռքը երաշխավորն են արցախահայության անվտանգության, իրավունքների և ազատությունների: Խորհրդաժողովը դիմում է միջազգային հանրությանը` քայլեր ձեռնարկել դադարեցնելու Ադրբեջանի ռազմաշունչ հայտարարություններն ու նկրտումները: Կասկածից վեր է, որ ի հարկին այդ հայտարարությունները գործնականում կստանան համարժեք պատասխաններ:

Անընդունելի և դատապարտելի է վրաց իշխանությունների կողմից իրականցվող խտրական քաղաքականությունը հայության նկատմամբ, որն իրականացվում է Ջավախքում, և որի մեկ այլ ապացույցն է հայկական պատմամշակութային կոթողների ոչնչացումը Թբիլիսիում: Նոր անախորժ և երկու ժողովրդների շահերից չբխող հակամարտություններից խուսափելու լուծումը Ջավախքի ինքնավարությունն է դաշնային Վրաստանի կազմում և Վրաստանի հայության բոլոր իրավունքների պաշտպանությունը` իրավական կարգավիճակ տալով Վրաստանում Հայ եկեղեցուն:

Խորհրդաժողովը վերահաստատեց իր վճռակամությունը` շարունակելու պայքարը Հայաստանի Հանրապետությանում ընկերային արդարություն հաստատելու, մարդու իրավունքների պաշտպանությունն ու ժողովրդավարությունը ամրապնդելու ուղղությամբ:

Հ.Յ.Դ. երիտասարդական և ուսանողական միությունների բարձրագույն մարմինների խորհրդաժողովը կոչ է ուղղում Հայաստանի և Սփյուռքի հայ երիտասարդությանն ու ուսանողությանը` լինել զգոն ու շրջահայաց` արտաքին ճնշումների նկատմամբ, աշխուժորեն ներգրավվել քաղաքական գործընթացներում, ներազգային և միջազգային մակարդակներում թույլ չտալ հայ մարդու և հայ ազգի իրավունքների ոտնահարում և հայության համար ճակատագրական այս ժամանակահատվածում սթափորեն և անվարան արտահայտել իր կամքը:

Հ.Յ.Դ. երիտասարդական և ուսանողական միությունների
խորհրդաժողով
20 Դեկտեմբեր 2009 թ.
Երևան

Անուն

Ստուգման կոդ

Հաղորդագրություն